ارریہ، 14 جولائی(ایس او نیوز/آئی این ایس انڈیا) بہار میں موسلادھار بارش کی وجہ سے سیلاب جیسے حالات پیدا ہو گئے ہیں۔مشرقی علاقوں میں کئی ندیاں خطرے کے نشان سے اوپر بہہ رہی ہیں۔بہار کے فاربس گنج کی ایک ویڈیو سامنے آئی ہے، جس میں شادی کے بعد ایک دلہن کو ڈھول کی کشتی پر بٹھا کر رخصت کیا جا رہاہے۔ویڈیو میں دکھائی دے رہا ہے کہ پلاسٹک کے ڈرم سے بنی ایک کشتی میں دولہا اور دلہن بیٹھے ہوئے ہیں، جبکہ کچھ لوگ آدھے پانی میں ڈوبے ہوئے ان کے ساتھ میں چل رہے ہیں۔اسی طرح آسام کے نوگاؤں ضلع سے بھی ایک ویڈیو سامنے آئی ہے جس میں برہمپتر دریا میں سیلاب کی وجہ سے پوری سڑک بہہ گئی۔ بہار کے ہر حصے میں جم کر ہوئی بارش نے قہر برپاکردیا ہے۔موسلادھار بارش نے بہار کے زیادہ تر شہروں کو دریا میں تبدیل کر دیا ہے۔بھاری بارش سے بہار میں بہنے والی ندیوں میں پانی تیزی سے بڑھ رہا ہے جس سے سیلاب کا خطرہ پیدا ہو گیا ہے۔مسلسل بارش کے سبب نیپال سے نکلنے والی ندیاں ابال پر ہیں۔اس کی وجہ سے کوسی علاقے میں خطرہ بڑھ گیا ہے۔وہیں، گنگا سمیت دوسری دریاؤں میں بڑھتا پانی خطرے کی گھنٹی بجا رہا ہے۔مدھوبنی-جھنجھارپور کے پاس کیٹرپلر دریا کا باندھ ٹوٹ گیا ہے جس سے سینکڑوں لوگ گاؤں میں پھنس گئے ہیں۔کشن گنج اور نیپال کے ترائی علاقوں میں کئی دنوں سے جاری موسلادھار بارش سے ضلع میں بہنے والی تمام ندیاں ابال پر ہیں،درجنوں گاؤں سیلاب کی زد میں ہیں۔شیوہر میں ضلع مجسٹریٹ (ڈی ایم) اور پولیس سپرنٹنڈنٹ (ایس پی) کی رہائش گاہ میں پانی گھس گیا ہے۔سیلاب کے خطرے کو دیکھتے ہوئے اتوار تک تمام اسکولوں میں چھٹی کر دی گئی ہے۔کوسی دریا خطرے کے نشان سے اوپر بہہ رہی ہے۔آبی سطح کے زیادہ سے زیادہ ڈسچارج کو دیکھتے ہوئے محکمہ آبی وسائل کی ہدایت پر کوسی بیراج کے تمام 56 دروازے کھول دئے گئے ہیں۔براج پر انجینئر کی ٹیم مسلسل کیمپ کر رہی ہے۔خطرے کو دیکھتے ہوئے براج کنٹرول روم کے پاس لال بتی جلا دی گئی ہے،کئی ہزار افراد بے گھر بتائے جا رہے ہیں۔